Ny Alahamady faha-464 taona izay nankalazana ny Taombaovaon’ny Malagasy rehetra teny amin’ny Kianja Anosimanjaka no notontosain’ny Zanadranavalona Anosimanjaka izay eny amin’ny kaominina Ambohitrimanjaka, ny sabotsy sy alahady ary alatsinainy 31 martsa 2025. Ity Taombaovao malagasy ity izay nosantarina tamin’ny arendrina sy ny manodidina izany ny sabotsy 29 martsa 2025 raha ny fanafanan’ny Orchestre PAP’S ny Alahamady no nalaza ny 30 martsa 2025.
Nofaranana tamin’ny hiragasy roa tonta izay nahitana an-dRafara Hasimanga Georgine avy any Ambohimandroso sy Ranoelison avy any Ampahimanga io Alahamady io ny 31martsa 2025. Ny Alahamady izay manaraka ny tsinam-bolana na ny « calendrier lunaire » dia efa nanomboka tamin’ny andron’ny mpanjaka Ralambo no nankalazana azy io. Izy io izay manamarika ny fiandohan’ny taona araka ny tetiandro malagasy. Antom-pisiany ny hanajana ny fomban-drazana mahamalagasy sy entina hanamafisana ny firaisankina eo amin’ny fiarahamonina malagasy. Natao ihany koa hanomezan-danja ny kolontsaina malagasy indrindra fa hanomezana voninahitra ny razana. Nanomboka tamin’ny fotoana nankalazan’ny mpanjaka Ralambo ny Alahamady ka hatramin’izao dia tsy nitsahatra nankalaza izany Alahamady izany ny Zanadranavalona Anosimanjaka.
Ny Alahamady faha-464 taona amin’ity taona 2025 ity araka izany no nankalazan’ny Zanadranavalona Anosimanjaka nandritry ny telo andro ity. Izany hoe ny Alahamady faha-464 taona araka izany ity nankalazaina ity. Ny Alahamady izay nankalazana ny Taombaovaon’ny Malagasy rehetra fa tsy ny Taombaovaon’Imerina irery akory, araka ny fanazavan’ireo andriana tompoan’andraikitra mpikarakara ny Alahamady izay mpikambana ao amin’ny zana-dranavalona Anosimanjaka.
