Ny fanomanana ny fihaonana mivantana amin’ny Filoham-pirenena indray izao no atao, hoy ny vahoakan’Ambohitrimanjaka izay voakasiky ny tetikasa Tanamasoandro, ny faran’ny herinandro teo.
Tsy nisy naha afa-po ireo mponina eny an-toerana manko ny dinika nifanaovana tamin’ireo solontenam-panjakana isan-tsokajiny, mikasika ity tetikasa ity, hatreto.
Tsy voahaja ny hetahetam-bahoaka
Ankoatra ny fanaovan’ireo solontena tatitra mikasika ny fihaonana tamin’ny Senatera dia anisan’ny nodinihan’ireo mponina tonga nivory maro teo amin’ny kianja fanaovam-baolin’Ambohitrimanjaka tamin’io fotoana io ihany koa ny tsy fanajan’ny fanjakana ny hetahetan’izy ireo, ny amin’ny tokony hanajanona tanteraka ny asa aloha mandra-pisian’ny marimaritra iraisana eo amin’ity raharaha ity. Ny mifanohitra amin’izany aza no nataon’ny fanjakana dia ny fametrahana ity « guichet unique » ity, etsy amin’ny village Voara.
Dolara fa tsy Ariary
Anisan’ny notsikerain’ny mponina ihany koa ny famiravirana vola azy ireo. Ekena fa ho sandaina vola tokoa ny tany, saingy tsy mbola misy akory ny fifanarahana mazava dia ny resa-bola no nandeha avy hatrany. Ambonin’izany ny fanaovana ny tonom-bola ho Dolara fa tsy Ariary, izay nampanahy ny rehetra hoe vinan’ny Filoham-pirenena malagasy ve dia dolara no resahina sa vahiny tokoa no tena tompon’ny tetikasa sy ny famatsiam-bola ?
Pour mieux vous servir, l’AMP travaillera dans le respect de tout un chacun, dans la réalité des actualités et de ce qui nous entoure. L’objectivité sera notre mot d’ordre.
