Ny volana Oktobra ho avy izao no ho vita tanteraka ny asa fanorenana ny « Tempoly Xizu » eny Andranovelona. Tsiahivina fa ny taona 2019 no nanomboka ny asa fanorenana ireo foto-drafitr’asa eny Andranovelona izay iantsorohan’ireo mpiasa malagasy miisa manodidina ny 700 lahy. Moines mpitoka-monina miisa 60 ankehitriny no efa monina eny Andranovelona, Kaominina Fihaonana, distrikan’Ankazobe, manamorona ny Lalam-pirenena faha-04.
Tsy mampiasa fitaovana vaventy (Fitaovana mekanika) ireo mpiasa eny an-toerana fa ny herin-tsandry sy ny fampiasana ny saina no enti-manantontosa ireo asa goavana. Ny alahady 20 aogositra dila teo no nisy ny lanonana miendrika fangataham-pitahiana amin’ny alalan’ny vavaka noho ny efa nahavitana ny dingan’ny asa hatreo amin’ny vovonana. Raha toa ka ny fiangaliana ny haiady ho fikoloana ny vatana, saina ary ny fanahy hatrany no nahafantarana ireo Moanina sinoa. Ny ao amin’ny monastera Andranovelona tarihan’i mpaminany Bodista Shi Wule kosa anefa dia ny mozika no ifotoran’izy ireo ho fitaizana sy fikoloana ny maha olona ho fampanjakana ny fandriampahalemana sy ny firaisankina ary ny fifankatiavana.
Tsy mitsahatra manabe voho ny tontolo iainana amin’ny alalan’ny asa fambolena ireo karazan-kazo ireo « Moines » monina ao amin’ny vohitra faly Andranovelona. Nihatsara, araka izany, ny tontolo iainana eny an-toerana. Maro amin’ireo tanora monina manodidina an’Andranovelona ihany koa no nisitraka asa mahavelona. Tempoly goavana indrindra aty amin’ny Ranomasim-be Indianina ity miorina eny Andranovelona ity. Inoana fa hanamafy bebe kokoa hatrany ny firahalahiana sy fiaraha-miasa eo amin’ny firenena Sinoa sy Malagasy ny fahavitan’ny asa rehetra ao amin’ny vohitra Andranovelona ary hampandroso ny lafiny toe-karena sy ny fizahantany.
