Magic Jah, mpanakanto fantatra efa tany amin’ny taona 2006 amin’ny fiangaliana ny gadona mihetsika mampiavaka an’ny Afrika tahaka ny “Mapôka”, “Soukouss” ary ny famolahana ireo vakodrazana malagasy hanjary taokanto mahatety vanimpotoana sy mitoetra.
Nanokana fotoana lava ny lehilahy nentina nandalinana bebe kokoa ny tontolon’ny hira sy ny mozika. Anisan’ny nohatevenina, hoy izy ny fomba famoronana hira izay mifaka amin’ny fampitana endrim-panabeazana sy fizarana hafatra mafonja ho an’ny Daholobe. Tsy nohadinoina ihany koa ny fanatsarana ny lafiny fandrindrana ireo sanganasa. Hampiavaka ny fiverenana an-tsehatr’I Magic Jah ny fampahafantarana ny voka-pikarohana azo avy amin’ny fampiarahana ny “Sôva sy ny “Soukouss”. Ny “Sôva chaud” no anarana nasalotry ny tovolahy ity gadona vaovao ity.
Ny rindran-tsarin’ilay “vazo “Séraphine” izay efa tsy zoviana amin’ny maro no nanamarika indray ny fiverenan’I Magic Jah eo an-tokotaniben’ny hira sy ny mozika. Ho avy tsy ho ela ihany koa, hoy hatrany izy ny “Tsisy miala eo Rastà”. Nomarihany fa mitaiza ny hatanorany sy ny tanjaka izay mbola ananany ny filalaovana ny mozika. Miventy ny tokony handalana ny fihavanana sy mihira an-dRafitiavana ny tovolahy ao anatin’ireo tononkirany. Raha fintinina, miroso bebe koa hatrany hiazo ny sehatra maha matihanina azy I Magic jah. Antso avo no nataony hoa n’ireo mpikarakara hetsika ara-kolontsaina mba hahay hisafidy ireo teny mpanakanto manan-talenta sy nandalina hiaraha-miasa ho fanabeazam-boho ny mozika Malagasy.
