Hanamarika ny faha-05 taona nijoroany, amin’ny taona 2024 hiditra io ny Groupe « Ny fitia ». Tarihan’i Fanokely. Ity farany izay efa manana traikefa sy haizatra matanjaka eo amin’ny lafiny fitendrena zavamaneno (Gitara maranim-peo) sy ny famoronana tononkira ombam-peony noho izy efa nilona an-taonany maro tao anatin’ny habaky ny mozika. Ny Pasitera Randriamampionona Daniel, izay manatanteraka ny asan’ny mpiandry ondry, eo anivon’ny fiangonana FJKM Bejofo Fampihavanana, synodam-paritany Alaotra Chrome, no filoham-boninahitry ny tarika. Tao anivon’ny fiangonana FJKM Bejofo Fampihavanana rahateo no nahaterahan’ny Groupe « Ny fitia ». Antom-pisian’ny tarika ny hitory ny filazantsaran’i Kristy, amin’ny alalan’ny talenta ao anatin’ireo mpikambana. Marihana fa zanaky ny fiangonana avokoa no mandrafitra ny Groupe « Ny fitia ».
Anisan’ny mampiavaka ny tarika ny fivoizana ny « Hôsika » mampiavaka ny faritr’Alaotra. Mirona kokoa amin’ny filalaovana sy famolahana ny gadona mihetsika toy ny « Salegy… » anatin’ny sokajin-kira evenjelika ny Groupe « Ny fitia », hoy i Fanokely. Misy « jijy » ihany koa any anatin’ireo sanganasan’ny Groupe « Ny fitia » mba hanamorana ny fampitana ireo hafatra mafonja raiketin’ireo tononkira. Azo ambara ho mivoy ny « Mozika evenjelika Sihanaka », araka izany, ny tarika Anisan’ireo vazo mitaiza fanahy nahafantarana ny Groupe « Ny fitia » ny « Gônan’i Jesosy ». Eo ampiketrehana ny rindran-tsary ombam-peo amin’ny endrika DVD andiany faharoa ankehitriny ny Groupe « Ny fitia » izay handimby ny voalohany nirakitra rindran-tsary niisa 13. Hiara-dalana amin’izany ihany koa ny fanatanterahana fitetezam-paritra ho fanatanterahana ilay hoe : « Mitoria teny vaovao mahafaly ho an’izao tontolo izao ». Ramatoa Noro izay filohan’ny mpanazava SAMPATI no misahana ny fitaizana ara-panahy sy ny lafiny fandihizana eo anivon’ny tarika. I Anjara, no mitan-tsoroka amin’ny famoronana ny soradihy. Mariah, Larciah, Tandrify, Manampy, Fanampy, Tsilavina, Malalatiana, Tsinjo, Finoana, Anjara, Kely, Keissah,, Mia, Hasina, Avotra ary i Aina no mpandihy. Ny hanolotra ny kanto sy ny meva hatrany ho voninahitr ‘Andriamanitra no tanjona ho an’ny tarika.
Pour mieux vous servir, l’AMP travaillera dans le respect de tout un chacun, dans la réalité des actualités et de ce qui nous entoure. L’objectivité sera notre mot d’ordre.
