Ny 18 ka hatramin’ny 21 aprily 2025 no hotanterahana any amin’ny tora-pasik’i Vatomandry ny hetsika “Festival Dola Beach”. Ity andiany faha-13 ity dia izay hanasongadina ireo karazana fifaninanana ara-panatanjahan-tena maro sy fampisehoana goavana hiarahana amin’ireo mpanakanto malaza izay manana ny maha izy azy. Hanomezana lanja ihany koa ny tontolon’ny fizahan-tany any an-toerana.
Ireo fifaninanana ara-panatanjahan-tena maro toy ny taranja tolona sy ny “Beach Soccer” ary ny “Rugby Soccer” izay misokatra ho an’ny olon-drehetra raha hanafana ny fampisehoana goavana ny tarika Wawa izay efa zatra manafana sehatra. Ho avy any an-toerana ihany koa amin’io fotoana io ny tarika Kaiamba. Ny mpanakanto Black Nadia manokana izay sambany no handray anjara amin’ity hetsika “Festival Dola Beach” ity dia vonona tanteraka hanome ny tsara indrindra avy any aminy. Ankoatra ireo dia hisy ihany koa ny fifaninanana “Miss et Mister” sy ny “Carnaval Dancing” ary ny “Cabaret” hiarahana amin’ireo mpanakanto mivoy ny gadona basesa. Mandritra ireo efatra andro ireo araka izany no hampivondronana sy hitrandrahana ny talentan’ireo tanora avy any ifotony izay sady vina apetraka amin’ity hetsika farany herinandron’ny Paska ity.
Olona manodidina ny 20.000 isa eo ho eo no handrasana ho avy amin’ity hetsika “Festival Dola Beach” ity, araka ny fanazavan’ny filohan’ny fikambanana “Festival Dola Beach”, Alexander Lay Men. Mpanohana ny hetsika manome lanja ny sehatry ny zava-kanto sy ny lafiny kolontsaina eto Madagasikara tahaka izao ny “Yas Madagasikara”, araka ny fanazavan’ny tompon’andraikitr’ity orinasam-pifandraisana ity, tamin’ny mpanao gazety, teny Andraharo, ny 1 aprily 2025.
