Feno 25 taona amin’ity taona 2023 ity ny IFRP (Institut de Formation et de Recherches Pédagogiques) Ambodinandohalo, izay ivon-toeram-pampiofanana ho mpampianatra eo anivon’ny fiangonana FJKM. Nilaza ny tale amperinasa Docteur ANDRIAR Samuel fa ny famoahana ny gazety “HAY” no tsangambato lehibe hanamarika ny fankalazana izao taon-jaobily volafotsy izao. Etsy andanin’izany dia misy hatrany ny fanatsarana sy fanitarana ireo foto-drafitrasa isan-karazany mba ho fampiroboroboana ity ivotoeram-pampiofanana ity.
Mpampianatra literera sy siantifika
Efa an’arivony ireo mpiofana no nahavita ny fiofanana tao anatin’izay 25 taona izay ka navoaka sy nirahina araka ny fomba FJKM . “Telo taona ny faharetan’ny fiofanana eo amin’ny ivotoerana mba hahazoana ny marim-pahaizana Licence ho mpampianatra taranja siantifika sy literera. Marihina fa manaraka ny rafitra LMD ny fiofanana izay miisa eo amin’ny 60 eo ireo mpampiofana ” hoy ny komity mpitantana ny IFRP. Fantatra ary fa ho tanterahina etsy amin’ny FJKM Andrainarivo amin’ny alahady faha 12 martsa amin’n y 2 ora tolakandro ho avy izao ny fanokafana ny fankalazana ny taon-jaobily.