Miampy 3 indray ireo olona nivoaka ny hopitaly noho ny fahasitranany. Lehilahy iray 75 taona kosa no voatily vaovao mitondra ny tsimokaretina.
Araka izany dia mitontaly 122 no voatily sy efa voan’ity tsimokaretina ity eto amintsika.
Noho izany, mitombo 61 ny isan’ireo rehetra efa sitrana ary 61 ihany koa sisa no tazomina tsaboina eny anivon’ny tobim-pahasalamana manerana ny Nosy. Tsy misy amin’izy ireo anefa no manana fahasarotana ara-pahasalamana fa arahina akaiky kosa ity farany ity noho izy efa zokinjokiny.
Marihina ihany koa fa tsy misy ny matin’ity valanaretina ity eto amintsika.
Efa eny ho eny
Araka ny fanambarana dia mponina eny Soanierana eny ity olona vaovao voa ity. Midika izany fa eny ho eny ny valanaretina na dia tsy miparitaka be aza.
Koa ny fiarovana izany tsy hiely no ezaka lehibe voalohany tokony hatao. Tsy misy afa-tsy ny fihibohana ihany no fomba tsy hiparitahan’izany.
Ho an’izay tsy maintsy mivoaka kosa dia ilaina ny fanajana fatratra ny fepetra efa voalaza. Averina hatrany ny fampiasana ny sarontava sy ny fanasana tànana.
Aoka mba tsy hiandry sazy vao hahatsiaro tena hampiasa sarontava ny rehetra !
