BASIKETY 3X3 Miakatra hatrany ny lentan’ny mpilalao malagasy

Nahitana fiakarany sy fihatsarany hatrany ny lentan’ny mpilalao malagasy, eo amin’ny taranja basikety, lalaovin’olona telo. Araka ny filaharana navoakan’ny FIBA Afrika, eo amin’ny laharana faha-57 eran-tany sy faha-7 eto Afrika no misy an’i Madagasikara. Ny Egyptianina no mitana ny laharana voalohany, i Mali no faharoa ary i Kenya kosa ny fahatelo.

Manana isa 105 954

Isa 105 954 no azon’ny mpilalao malagasy ka nahatonga antsika ho ao anatin’ny folo voalohany manerana an’i Afrika.

Raha jerena isan-tsokajy kosa, tena tsara ny toerana misy an’i Madagasikara, eo amin’ny sokajy “Seniors” lehilahy, mitazona ny laharana faharoa ny mpilalao malagasy, aorian’i Egypta. Saika ry zareo Egyptianina hatrany no mitana ny voalohany eo amin’ny sokajy rehetra. Eo amin’ny sokajy latsaky ny 18 taona lehilahy mitana ny laharana fahatelo ny Malagasy.

Eo amin’ny vehivavy; latsa-danja kokoa ny laharana misy azy ireo mihoatra amin’ny lehilahy, na izany aza, mbola tafiditra anatin’ny 10 voalohany eto Afrika ry zareo.

Isan’ny tena nahatsara ity filaharana ity ho an’ny ekipa malagasy, ny nahazoany vokatra tsara hatrany teo amin’ny sehatra iraisam-pirenena, indrindra teto Afrika, toy ny nandrombahantsika Malagasy ny medaly volamena tamin’ny lalao afrikanina farany teo, tany Maraoka.

Vous aimerez aussi