Tandindomin-doza ny faritra rehetra, manoloana ny fihanak’ilay valan’aretina coronavirus na Covid – 19 amin’ny alalan’ireo “Cas Contact” noho ireo fepetra tsy voafehy, hoy ny avy eo anivon’ny antoko politika Hery vaovao ho an’i Madagasikara na HVM. Nanome sosokevitra indray, noho izany ny HVM, ny amin’ny mba tokony hitsinjarana isam-paritra ny fahefana manapa-kevitra sy ara-bola ary ny fampitaovana amin’ny fiadiana ity areti-mandripaka ity, hoy ny mpitondra tenin’ny antoko. Mila omena fiofanana sy fitaovana, hoy ny antoko, ho entiny miaro tena ny mpitsabo, mpianatra mpitsabo, ary mpitsabo mpanampy isam-paritra, hoy ny hatrany ny fanazavana. Mila aparitaka amin’ny faritra 22 ihany koa ireo fitaovana rehetra ahafahana manao fitiliana haingana na ny “Test de Diagnostic Rapide” na TDR. Tokony hatsangana isaky ny renivohi-paritany 6 koa ny toeram-pitiliana ahafahana manao ny fitiliana lalindalina na PCR. Mila atomboka ny fitiliana faobe izay miainga avy any amin’ny isam-pokontany, hoy hatrany ity antoko ity.
